2
Sonasɩ nynia 'e "ni -sɔn 'sʋ Nyɔsoa ja -smii' klaa" due', -wɛe -ɛ mla sonasɩ 'de ɔ nɩ 'e -smii' 'di 'jrʋ -gbao wɩ taan ke "maʋ wɩ taan. 2 'De -smii' 'di 'nɔ 'de Sonasɩ nɩ -wɛe ɔ bae Nyɔsoa ɔɔ' Kea ka,3 'na: -Ta 'ɩn nɩa 'de 'kle 'diɛ, 'bomɔ 'ɩn "wɔɔ 'ɩn 'daa Nyɔsoa
-Wɛe ɛ 'wɔn 'ʋn,
-Ta 'ɩn nɩa 'de 'mɛ bie 'di -wɛe 'ɩn "wɔa 'ɩn poa -too"- "i ɛ,
-Ɩn -wɔn 'ma wlu 'mɛ.
4 'Ma Kea, -mɔ -po' 'ʋn 'de 'tɔniɛ -sɔn,
'De 'ɩn blu i 'de "nibie
-Wɛe "ni 'a 'sɩn -pin' 'ʋn 'de woi -ta -wee', 'de 'tɔniɛ 'a srɩ' -gboe ke ɛɛ' 'plɩ -ɩa -cɛ" "i a ke ɩ -wee' jii 'ʋn "kpei
5 'De 'mɔ pɛe o ɛ, 'mɔ 'na:
'Ɩn 'wlʋ 'e -mɔ Nyɔsoa "juɛi 'mɛ 'bode.
'Kaa -ma -gbu" -kwɛa i ɛ, 'ma muɛ "jriɛ i -kwea' -wɛe 'ɩn 'jeɛ 'jraa-.
6 "Ni ji' mamaʋ 'sʋ ɛ je 'ʋn -pliɔn' kpʋʋn- ɛ muɛ 'ʋn 'kmʋ -saa' 'de-.
'Tɔniɛ jiiɛ 'ʋn "kpei -jii -jii, -gbee -pɩn' a 'ma "jru i.
7 'Ɩn mu' mamaʋ 'sʋ -ta crʋɩ 'a 'sɩn 'wlʋa 'ɩn je 'e nyni 'de 'tɔniɛ -sɔn.
'Blʋa -criiɛ 'ʋn kwli "jrii 'bode -bode 'bode -wee' 'de-.
'Kaa 'de ɛɛ' 'kmʋ nɩa' 'ʋn ɛ, Nyɔsoa 'ma Kea ɛmɛ -nʋɛ -wɛe 'ɩn nɩ 'kmʋ 'de -ɛ -sa 'ʋn 'de "bie -nɛ 'di.
8 -Ta 'ma dɩ cɛan 'de 'ma -cɛ" 'ʋn, -wɛe 'ma 'jea 'mɩa 'a 'sʋ i ɛ,
'Bomɔ 'ɩn poo 'ma -tɩ' -kwlʋ o, 'de Nyɔsoa, -wɛe 'ma baewlu ji mamaʋ 'sʋ ɛ jɛɛ -ma -gbu" -kwɛa i ɛ.
'De -ma -gbu" -ɛ -kwea i 'di.
9 Nyʋ -ʋʋa -gbɛɛ' a kɔin "juɛi ɛ,
-Mʋ se -ma 'saa 'ʋn 'je i.
10 'De -bo ɛ -tu" 'mɔ ɛ, 'ma muɛ blea' 'ɩn 'je -ʋn 'nynɩ -sa, 'ma muɛ 'sraa -saa' 'ɩn 'je -ʋn "nyɩ, ɛmɛ -nɩ 'ma -ma 'sɛ po wlu.
Wlu cɛan -tie" ɛ, 'ma muɛ -ʋn 'de i -fʋn 'a. Dɛ -nʋɛ', 'de Nyɔsoa 'ʋn 'de 'pʋʋa nɩ-.
11 'De -mɛ 'de ɛ, Nyɔsoa 'tmʋʋ -smii' klaa" -nɛ 'mɛ -wɛe -smii' mu ɛ -kwla' Sonasɩ 'de 'kpʋʋ "kpei.